عدد الرسائل: 44 الموقع: warriors.hooxs.com العمل/الترفيه: مهندزة المزاج: فل الفل تاريخ التسجيل: 08/06/2008
موضوع: أسطورة .. البطل الإثنين أغسطس 04, 2008 6:58 pm
.. الحال سئ .. والاراضى العربية محتلة محتلة .. موبوءة مختلة .. مليئة بالراقصين والمطربين ومصاصى دماء الناس .. اولادها مشللون لا يقدرو ن على شئ وبناتها باهتات متكررات ..
ونحن الشعب المسكين .. الطيب البرئ .. الذى ذاق الويلات .. وصبر صبرا جميلا فى انتظار فرج من عند الله .. ننام ونحلم ببطل جديد .. اى أم ستلده ؟؟ .. اى أب سيهبه اسمه ؟؟ .. بالتاكيد امه وابوه مع الشهداء ..
نعيش الذل والقهركل ساعة ولكننا ابدا لم نكف عن الحلم بـ .. صلاح الدين .. لانهم - كما نعلم - ابدا لن ينتزعوا منا الحلم .. سيأتى اليوم الذى تولول فيه امهات الصليبين على ابنائهم الذين سندفنهم بايدينا فى التراب الذى اتوا من اجل خيراته .. وتحت السماء التى تجرؤا على انتهاك قدسية اراضيها المباركة ..
وستعود الاراضى العربية نظيفة طاهرة مرة اخرى .. بعد ان ياتى جيش البطل الملائكى صلاح الدين ويريكم كيف يكون الانتقام .. وكيف ان الدم العربى له ثمن فى غاية الغلاء .. . .
والحقيقة يا معلمين - وخلونا نرفع الكلفة بقى - ان ده كله (أيواااااااااااااااان ) كلام ناس لا مؤاخذة فاضيين .. ومعللش يعنى بلاش اقول مأنتخين ..
وبما انى خلاص دخلت دخلة شمال واللى كان كان .. وقبل ما حد يبصلى بصة من اياهم .. فلازم ألحق نفسى واقول ان عيب اوى اننا نحلم بصلاح الدين ..ده حتى مش ف مصلحتنا ..
بيقولوا ان فى الحرب العالمية التانية فيه جنرال ظريف شعره اصفر جه ودخل قبر صلاح الدين وقال بحقد وهو بيجز على سنانه ( ها نحن قد عدنا يا صلاح الدين ..)
الحقيقة المرة انهم ما خرجوش اصلا عشان يعودوا !!
ازاى؟! ده صلاح الدين طردهم .. واداهم على قفاهم ؟؟ .. هتقولولى احمد مظهر .. سليمان معرفش مين اللبنانى ده .. .. القصة بتاعة العربى ؟؟! .. الحقيقة برضه ان كل ده - خصوصا الفيلم - مافيهوش من الحقيقة الا حوالى 30% .. والسبب طبعا انه ( فيلم عربى )
صلاح الدين طرد الصليبين (امريكا)؟! .. لأ .. صلاح الدين حرر فلسطين (من اسرائيل)؟! .. محصلش .. وحد الشعوب العربية ؟! .. الحقيقة ان .. لأ ..هخبى عليكم ليه يعنى !! صلاح الدين كان بنى ادم محترم ويعرف ربنا ؟!.. بتسألوا ليه واحنا مالنا !!
الواقع التاريخى بيقول ان صلاح الدين قدر يحرر القدس - اللى هى مدينة - لكنه محررش فلسطين ولا طرد الصليبيين .. ده - ركزوا بقى -عمل اتفاقيات سلام مع الصلييبين .. يعنى القدس اللى اتحررت كانت محاطة بالمستعمرات الصليبية حتى فى فلسطين نفسها ؟؟! .. ايوة .. عشان كده بعد اربعين سنة خدوها تانى وكانك يا صلاح ما غزيت .. لكن بيبرس قدر يرجعها بعدها بكام سنة لانه - للصدفة السعيدة - كان بطل هو كمان (عقبالنا)
يعنى انا مش جاية عشان اقول ايه ؟!.. انا مش جاية اقول ان صلاح الدين كان اى كلام .. بالعكس .. ده بطل وسياسى شاطر من الدرجة الاولى .. امال عاوزة اقول ايه قبل ما حد يتهور ؟! ..
عاوزة اقول اللى انتم عارفينه .. ان الشعوب الخيبانة هى اللى بتراهن على بطل .. على فرد .. على كتلة من المميزات والعيوب .. على عقل قاصر وكيان مش كامل .. والادهى من ده كله ان حتى لو كان من الأملة (عكس الوكسة) الرهان على فرد , فانت بتراهن على حد تانى .. غيرك !!
الاسلام علمنا ان الرهان الصح بيكون على الأمة .. بيكون على الشباب .. بيكون على ان كل واحد لازم يكون خبير فى حاجة صغيرة عن غيره..
عشان كده ما ينفعش نحلم بصلاح الدين .. هتقولولى انتى كده بتغلطى ف كبيرنا !!..( أااااايوه بغلط ف كابيركم ) اقولكم .. بلاها صلاح .. خدوا قطز ..
وقبل ما تاخدوه هسأل سؤوال برئ .. هو قطز كان بيحارب الصليبيين ازاى اذا كان هو جه بعد صلاح الدين اللى طرد الصليبيين ؟!.. يبقى صلاح الدين مطردهمش .. ولما جه قطز كانت الامور منيلة زى ما كانت لما جه صلاح الدين واكتر .. وبرضه قطز ما طردهمش .. النظرية هى : اثبت ان قوى وتقدر على النصر لو مرة .. سواء بعين جالوت او باكتوبر 73 .. وبعدها اتفاقيات سلام ومشى امورك .. (ايواااااااان )
وعشان الامور دلوقتى منيلة اكتر واكتر .. فالناس قاعدة مستنية البطل .. والشيوخ قاعدة تتكلم عن المهدى المنتظر .. والمستشيخين عمالين يتنبؤا بصلاح الدين .. والحقيقة ان البطل شخص عادى جدا .. يعنى هما ببساطة بيستبشروا بزيادة سكانية لا اكتر ولا اقل .. لان كل بنى ادم بيتولد - ببساطة - هو البطل ..
موضوع: أسطورة .. البطل 
الإثنين أغسطس 04, 2008 6:58 pm
)
..
